الرئيسيةس .و .جبحـثالتسجيلدخول

شاطر | 
 

 دى برضه يا ابنى دولتك

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
مستر/عطيه الخضرى

avatar

الجنس : ذكر
العمل : مدرس اول لغه انجليزيه
الاقامة : قلين
عدد المساهمات : 111

مُساهمةموضوع: دى برضه يا ابنى دولتك   السبت أبريل 30, 2011 5:32 pm

مرحله ما قبل الثوره
دى برضه يا ابنى دولتك
حوار بين الام وابنها
الام
يا ابنى ريح خليك ف حالك
ربى عيالك
خلى دايما ف الدنيا انشغالك
لو معاك قرشين متنغرش بمالك
اوعاك تسال عن اى شى
سيبك من سؤالك
متفكرش ف اى شىء انته مالك
امشى جوه الحيط يا قلبى يا ابنى
مهما جرالك
فلبى عليك يا ولدى
قول يارب يرأف بحالك
ارجع لربك صلى وصوم
عشان اقول هنيالك
يا حبه قلبى يابنى مشتقالك
محتجالك
بيقطعوا ف امك يا ولدى
نفسى حته من قلبى يدوهالك
بس مش لقياك يا نضرى يابنى
انته فينك فين عيالك
نصيحه يابنى من كل قلبى بقولهالك
الحكومه يابنى
لو خلعت لك جذمتك
وبعصايه مدتك
لو من بيتك طردتك
وخلعت جذمتها وناولتك
ومن غير اى غلطه حسبتك
دى برضه يا بنى دولتك
لو بين العرب فضحتك
ووسط عيالك دبحتك
وبكل ما فيها حربتك
مهمهاش خوفك عليها ومحبتك
دى برضه يابنى دولتك
لوشجعت كل الفساد
لو رجعت فرعون وعاد
ومن ودانك شدتك
دى برضه يا بنى دولتك
لو زورت ف الانتخاب
لو زرعت كل الدنيا خراب
لو شحتتك على الابواب
لو حبستك او حصرتك
علشان تموت بحسرتك
دى برضه يابنى دولتك
لو موتت ابوك بالفشل
لو حتى بيتك يتنشل
لو قالوا عنك مات وانشل
لو حتى زرعك مات وانشل
لو نام عيالك من غير غطا ف عز الطل
لو حتى مت من الديون مش لاقى حل
ومعدتش لاقى لقمتك
ولا حتى لاقى هدمتك
دى برضه يابنى دولتك
لو الزباله بقت اكلتك
والادويه علتك
مش قادر تشكى علتك
ولا قادر تطلع ضحتك
خلاص مضاعت صحتك
محبوسه جواك فرحتك
ماتت خلاص امنيتك
دى برضه يابنى دولتك
يمكن ولادك يتشردوا
سواء رفضوا او رضوا
لو من هدومهم اتجردوا
اوعاك ف يوم يتمردوا
علشان للحبس هيتعرضوا
احمد واشكر ولو ف وش المدفع حطتك
دى برضه يابنى دولتك
خلاص يابنى معدتش وحيدها
دا حتى مصيرها ما هوش بايدها
يابنى الفساد ابوها وسيدها
اصبح خلاص ساكن وريدها
وانته وولادك عبيدها
عايز تعيش احفظ نشيدها
غنى ف عيدها
وبوس ترابها وراسها وايدها
بلدك مضاعت
معدش حد يقدر يعيدها
دارى يابنى دمعتك
وارضى بزبالتك لقمتك
دى برضه يابنى دولتك
الابن


كفايه يامه معدتش قادر
كفايه حكم الظالم الغادر
احلف بربى يامه لازم احررك
واصلى واشكر ربنا عشان صبرك
خلاص يامه لازم افوق
لازم يا امى اكبرك
احضن الامى جوه قلبى واطهرك
اموت على ارضك يا امى
يمكن دمى يعطرك
بحبك يا امى وحبى ليكى شىء نادر
كفايه يامه معدتش قادر
كفايه حكم الظالم الغادر
خلاص يا امى هاخد خواتى ونعرف حدودنا
خلاص يا امى كفايه لازم نطرد سوسنا ودودنا
لازم يا امى كل الدنيا تعرف ردودنا
لازم يا امى الحب تانى يرجع يسودنا
ويطرح زهر الامل يامه على عودنا
اترحمى علينا يامه لو متنا
وابقى احضنينا يامه لو عدنا
واحلف بشرفه يا امى
لنوفى بوعودنا
وبكره يامه ننصب الشادر
كفايه يامه معدتش قادر
كفايه حكم الظالم الغادر
ساحه حربى يامه ميدانك التحرير
ارواحنا وسط الميدان هتحدد المصير
هنجيبوا حقوقنا يا امى من عين الوزير
معدتش تانى هيسامح فلبك الكبير
هيعرف حدوده الوزير
ويعرف حقوقه الغفير
كلنا فايق يا امى
كلنا اصحاب ضمير
اقسم بربى نحررك
ونطهرك
ونخلى اسم الميدان ميدان التغيير
قرارنا يامه خلاص صبح صادر
كفايه يامه معدتش قادر
كفايه حكم الظالم الغادر



الرجوع الى أعلى الصفحة اذهب الى الأسفل
 
دى برضه يا ابنى دولتك
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
مركز قلين :: القسم الثقافى ::   :: الأدب والشعر-
انتقل الى: